Jer 22 | ZomZIV | STEP | TOPA gen hih ahi hi: “Judah kumpipa’ kumpi inn ah paisuk inla tua lai-ah hih thupuak tangko in:

Jeremiah 22

Kumpi Gilote Tungah Thukhenna

1 TOPA gen hih ahi hi: “Judah kumpipa’ kumpi inn ah paisuk inla tua lai-ah hih thupuak tangko in: 2 David kumpi tokhom tunga tu Judah kumpipa aw, nang le na uliante le hih kongpi tawna pai mi khempeuh in TOPA kammal za un. 3 TOPA thugen hih ahi hi: ‘Thumaan thutangin nasem un. A kisut gawp mite a nengniamte khut panin hukhia un, pemtate, pa nei lote le meigongte tungah khial loin gamhtat kei unla hih munah mawhpengte sisan luangsak kei un. 4 Ahang in, hih thupiakte limtaka na zuih den uh leh David tokhom tunga tupa hih kumpi’ inn kongpite tawnin ama uliante le a mite tawh sakolleng le sakol in a lutkhawm ding uh hi. 5 Ahi hangin hih thupiakte a zuih kei uh leh TOPA kei le kei ka kiciam hi, hih kumpi’ inn a kisusia ding hi,’ ka ci hi,” a ci hi. ^a

6 Ahang in, Judah kumpipa inn tawh kisai TOPA thugen hih ahi hi:

“Nangmah in kei tungah, Gilead na banga, ^b
Lebanon mualdawn na bang zongin
keimah in sehnel-gam hong bangsakin ^c
kuama tenlohna khuapite tawh kong kibangsak ding hi.
7 A susiate amau galhiam ciat uh tawh
nang susia dingin kong kuansak ding a, ^d
amaute in na tamtak khuam hoihte uh ^e
hong phuksakin mei-ah a khul ding uh hi.

8 “Minam tampite hih khuapi nawkin pai ding uh a, khat le khat kidongin, ‘Bang hangin TOPA in hih khuapi lian hici bawl hi ding hiam?’ kici ding uh hi. 9 Tuateh: ‘Amaute in TOPA a Pasian uh thukhun taisan uh a; pasian dangte bia-in a na a sep hang uh ahi hi,” ci-in kidawng ding hi, ci hi,’ va ci in,” hong ci hi.

10 A sisa kumpipa kah kei unla, a supnate hangin thum kei un;
sal-a kikai ama adingin kah cihtakin kap zaw un;
bang hang hiam cih leh amah hong kileh kik ngei nawn loin
a pianna gam mu kik ngei nawn lo ding hi.

11 Ahang in, a pa za a laih Judah kumpi-a om, ahi hangin ama omna mun panin a paikhiasa Josiah’ tapa Shallum ^{▼▼22.11 Jehoahas zong kici} thu tawh kisai TOPA gen hih ahi hi: “Amah a kileh kik ngei nawn kei ding hi. 12 Amaute in sal-a a pina uh munah si dinga; hih leitung a mu kik nawn kei ding hi,” a ci hi. ^g

13 “A kumpi inn thumaan loin lama ^h
a inndei tungnungte thutang loin a lam mi,
a gam sunga mite a mawkna-in semsaka, ⁱ
amaute thaman a pia lo mi in gimna thuak ta hen.
14 Amah in, ‘Kumpi inn a lianpi khat ka lam dinga, ^j
inndei tungnung tampi ka neisak ding hi,’ ci hi.
Tua ciangin kongvang neu zapipi bawla,
tamtaksing thuapsawnin ^k
asanin a zem hi.
15 Tamtak tam neih semsemna in
nang kumpi hong suaksak ahi hiam?
Na pa in nek ding dawn ding nei lo ahi hiam?
Amah in thumaan le thutangin na sem a, ^l
tua ciangin na khempeuh ah a daupai hi.
16 Amah in a zawngte le a kitasamte’ thu panpih a,
na khempeuh ah a daupai hi.
Tua in kei nong theihna uh a khiatna hi lo ahi hiam?” ^m
TOPA in cikhia hi.
17 “Ahi hangin na lungsim uh le na mit un,
aman lo-a metna bek mitsuana, ⁿ
mawhpengte sisan luansak ding,
mi nuainet ding le ngongtat ding bek na sawm uh hi,” a ci hi. ^o

18 Tua ahi ciangin Judah kumpipa Josiah’ tapa Jehoiakim tawh kisai-in TOPA gen hih ahi hi:

“Amaute ama adingin thumin:
‘Ka sanggampa tazen aw! Ka sanggamnu tazen aw! A ci kei ding uh hi.
‘Ka pu aw tazen aw!
A thupina aw, tazen aw! ci-in a thum kei ding uh hi.
19 Amah laa khat kivui bangin -
Jerusalem kongpite pualam ah
kikaikhia in a kipai ding hi,” a ci hi.
20 “Lebanon ah paito unla kiko khia un,
Bashan ah na aw uh kizasak un; ^p
na pawlte khempeuh uh kizogawp ahi manin ^q
Abarim panin kiko un. ^r
21 Awlmawh na neih loh laitakin kong vauhilh hangin,
‘Hong mang kei ning!’ na ci hi.
Na neu tungua kipan a tuaci den na hi uh a; ^s
ka thu nong mang kei uh hi.
22 Na tuucingte khempeuh huih in lenmang dinga, ^t
na pawlte salin a paimang ta ding hi. ^u
Tua ciangin na gitlohna khempeuh hangin
na mai zumin na zahlaak ding hi. ^v
23 No, Lebanon ^{▼▼22.23 Tua pen Jerusalem kumpi inn (1Kp. 7:2 en in)} ah tengin
tamtak inn sunga om hithiatte aw,
numei nausuah nat bangin natna in ^x
note tungah hong bingphawn ciangin bang na ci tau uh tam!

24 TOPA in, “Ka nuntakna ka lo hi, Jehoiakim tapa Judah kumpipa Jehoiachin ^{▼▼22.24 Hebrew in Coniah; Jehoiachin tawh kilamdang lo tg.28 ah zong} ka khut taklam a ka zungbuh na hi zawzen zongin kong suahkhia lai veve ding hi; 25 Nang hong that nuam na kihtak - Babylon kumpipa Nebuchadnezzar le Babylon mite ^{▼▼22.25 Ahikeh Chalda-te} tungah kong pia ding hi. 26 Nang le ta-a hong nei na nu gamdang ah kong nawhkhiamang dinga, na lamh kiatlohna munuah na nihun na sikhawm ding uh hi. 27 Na ciah kik nopna munuah na ciah kik ngei nawn kei ding uh hi,” a ci khia hi. ^aa

28 Hih mipa, kuama deih loh
beel kitamsa Jehoiachin hi lo ahi hiam?
Bang hangin amah le a tate
a theih lohna uh gamah kilawnkhia ahi hiam? ^ab
29 Ka gam, ka gam, ka gam aw, ^ac
TOPA thu za dih ve!
30 TOPA thugen hih ahi hi:
“Hihpa tasel in ciamteh in ^ad
a khantawnin a daupai ngei kei ding hi, ^ae
ahang in, ama suante daupai lo ding uh a,
David kumpi tokhom ah khat beek tu loin ^af
Judah a uk ngei nawn kei ding uh hi,” a ci hi.